سلمان خان جلد بچہ گود لیں گے!

آئندہ دو یا تین برسوں میں بچہ گود لینے کی منصوبہ بندی کی ہے،سلمان خان

ممبئی -بالی ووڈ کے دبنگ خان نےاپنی دلی خواہش کا اظہار کرتے ہوئے کہا ہے کہ وہ بچہ گود لینا چاہتے ہیں۔ بالی ووڈ میں ان دنوں بچوں کو گود لینے کا رواج نکل پڑا ہے ، بھارتی فلم انڈسٹری کے متعدد اداکاروں نے  نہ صرف بچے گود لیے بلکہ سروگیسی کے عمل کے ذریعے بھی والدین بنے ، جن میں کرن جوہر، شاہ رخ خان  اور عامر خان وغیرہ شامل ہیں، حال ہی میں سنی لیونی نے ایک ڈھائی سال کی یتیم بچی کو گود لے کر اس کی زندگی سنوارنے کا فیصلہ کیا ہے، اور اب سلمان خان نے بھی ان کے نقش قدم پر چلتے ہوئے فیصلہ کیا ہے کہ وہ آئندہ دو یا تین سالوں میں بچہ گود لینے کا ارادہ رکھتے ہیں۔

سلمان خان بھارت کے سب سے زیادہ چاہے جانے والے کنوارے ہیں جن کا نام متعدد بار مختلف حسیناؤں کے ساتھ جوڑا گیا جن میں لولیا وینتر، کترینہ کیف، ایشوریا رائے، زرین خان کے نام قابل ذکر ہیں ، یہاں تک کہ لولیا وینتر کے ساتھ سلمان کی شادی کی افواہیں بھی میڈیا میں زیر گردش رہیں، جب کہ سلمان کی بچوں سے محبت بھی کسی سے ڈھکی چھپی نہیں، وہ اپنے بھانجے آہل سے بے انتہا محبت کرتے ہیں، یہ ہی وجہ ہے کہ ان کے والدین چاہتے ہیں کہ سلمان جلدی سے شادی کرلیں لیکن سلمان نے اپنے مستقبل کی کچھ اور منصوبہ بندی کررکھی ہے ، حال ہی میں ایک انٹرویو کے دوران سلمان نے اپنے ارادے ظاہر کرتے ہوئے کہا وہ بچہ گود لینا چاہتے ہیں۔

دبنگ خان کا کہنا تھا کہ میں بچوں سے بے حد محبت کرتاہوں اور میرے والدین مجھ سے محبت کرتے ہیں اوراپنی زندگی میں میری اولاد دیکھنا چاہتے ہیں لہٰذا میں نے ان کی خواہش کا احترام کرتے ہوئے آئندہ دو یا تین سالوں میں  بچہ گود لینے کی منصوبہ کی ہے۔

واضح رہے کہ سلمان خان ان دنوں فلم ’’ٹائیگر زندہ ہے‘‘ کی شوٹنگ میں مصروف ہیں ، فلم میں ان کے ساتھ کترینہ کیف مرکزی کردار میں نظر آئیں گی :-

اپنی رائے کا اظہار کریں

Your email address will not be published. Required fields are marked *