بنگلہ دیش کے 100 ملین ڈالرفیڈرل ریزرو بنک امریکا سے غائب ہوگئے

AMerica Bank

واشنگٹن -ہیکروں نے مبینہ طور پر امریکا کے فیڈرل ریزرو بینک آف نیویارک سے بنگلہ دیش کے تقریباً ایک سو ملین ڈالر چوری کر لیے ۔ بنگلہ دیشی حکومت اب اس امریکی بینک کے خلاف مقدمہ دائر کرنے کی منصوبہ بندی کررہی ہے۔ میڈیارپورٹس کے مطابق ایسا شاذو نادر ہی سننے کو ملتا ہے کہ ہیکروں نے امریکی فیڈرل ریزرو بینک آف نیویارک سے کسی ملک کے پیسے چرا لیے ہوں لیکن یہ حقیقت ہے کہ اس بینک سے بنگلہ دیشی حکومت کے پیسے چوری ہو چکے ہیں۔ بتایا گیا ہے کہ مشتبہ ہیکروں کا تعلق چین سے ہے اور انہوں نے یہ کارروائی پانچ فروری کو کی تھی۔ ڈھاکا میں واقع سینٹرل بینک کے عہدے داروں کے مطابق یہ رقم بنگلہ دیش کے امریکا میں کھولے گئے زر مبادلہ کے اکاؤنٹ سے چرائی گئی ہے۔ دوسری جانب امریکی ریزرو بینک، جو کہ بنگلہ دیش کے بینک ریزرو اکاؤنٹ کا انتظام سنبھالے ہوئے ہے، نے ایسی خبروں کی تردید کی ہے کہ ان کا سکیورٹی سسٹم توڑا گیا ہے۔ ڈھاکا میں بنگلہ دیش کے وزیر مالیات اے ایم اے محیط نے صحافیوں سے گفتگو کرتے ہوئے کہا کہ ہم نے سنا ہے کہ فیڈرل ریزرو بینک آف نیویارک نے مکمل طور پر اس کی ذمے داری لینے سے انکار کر دیا ہے۔ انہیں ایسا کرنے کا حق نہیں پہنچتا۔جب ان سے پوچھا گیا کہ اب بنگلہ دیش حکومت کیا کرنے کا ارادہ رکھتی ہے تو اس بنگلہ دیشی وزیر کا مزید کہنا تھاکہ ہم ہر صورت اس بینک کے خلاف مقدمہ درج کروائیں گے۔ ادھر بنگلہ دیش کے سینٹرل بینک نے کہا ہے کہ انہیں چوری شدہ رقم کا کچھ حصہ واپس مل گیا ہے لیکن فلپائن کے حکام سے مسلسل رابطے میں ہیں تاکہ پتہ چلایا جا سکے کہ اس کارروائی کے پیچھے کس کا ہاتھ ہے۔ بنگلہ دیشی حکام کے مطابق فلپائن کا اینٹی منی لانڈرنگ کا ادراہ اس سلسلے میں اپنی کاوشیں جاری رکھے ہوئے ہے :-

اپنی رائے کا اظہار کریں

Your email address will not be published. Required fields are marked *